అమానతు

షేఖ్ ముహమ్మద్ బిలాల్ 

అమానతు... ఆ మాట  వినగానే భూమ్యాకాశాలు భయాందోళనతో కంపించిపోయాయి. పర్వతాలు వణికిపోయాయి. ఆ బరువును మోయటానికి సాహసించలేకపోయాయి. కాని మానవుడు మాత్రం మారు మాట్లాడకుండా ఆ భారాన్ని తన నెత్తిన వేసుకున్నాడు. ఎంతైనా మానవుడు మహా మొండి ఘటం. ఆ విషయాన్నే అల్లాహ్‌ా
ఇలా తెలిపాడు:-  ''మేము ఈ అప్పగింతను(అమానతు) ఆకాశాల ముందూ, భూమి ముందూ పర్వతాల ముందూ పెట్టాము. అవి దానిని మోయటానికి సిద్ధపడలేదు. దానికి భయపడ్డాయి. కానీ మానవుడు దాన్ని తనపై మోపుకున్నాడు.'' (33:72)
 మహాప్రవక్త(స) గారి జీవితం అమానతుకు ప్రతి రూపం. ప్రవక్త(స) గారిపై అప్పగింతగా దివ్యఖుర్‌ఆన్‌న్ని అవతరింపజేశాడు అల్లాహ్‌ా. ఆయన్ని (స) ప్రవక్త పదవి లభించక ముందు  నిజాయితీపరుడు, సత్యసంధుడు అని పిలిచేవారు ప్రజలు. అలాంటి నీతిమంతుడు, నిజాయతీపరుడు అయిన ముహమ్మద్‌(స) గారు అమానతు గురించి తెలిపిన కొన్ని విషయాలను తెలుసుకుందాం.
''ఎవరిలోనైతే అమానత్‌ లేదో అతనిలో విశ్వాసం లేదు'' (ముస్నద్‌ అహ్మద్‌). విశ్వాసి కావడానికి నిజాయితీపరుడు, అమానత్‌ దారుడు కావడం ఎంతైనా అవసరం. అప్పగింత అంటే అప్పగించిన సామాన్లను తిరిగి వారికి అప్పగించడమేనా? లేక ఇస్లామీయ పరిభాషలో ఇంకా వేరే అర్ధాలు ఉన్నాయా?  ధర్మశాస్త్రం ప్రకారం అప్పగింత(అమానతు) కు విశాలమైన అర్ధాలు ఉండాయి. అందులో ముఖ్యంగా నాలుగు విషయాలు గమనార్హ మైనవి:
(1) విశ్వాసం: అల్లాహ్‌ా తప్ప వేరే దేవుడు లేడని, సృష్టించడానికి, పోషించడానికి, జీవన్మరణాలకు సంపూర్ణమైన శక్తి కేవలం అల్లాహ్‌ాకు మాత్రమే కలదని నమ్మడం అమానత్‌.

(2) ఆరాధన:
ప్రవక్త ముహమ్మద్‌(స) గారు ఆచరించి చూపిన పద్ధతి ప్రకారం ఆరాధించడం, అందులో ఇసుమంతైనా మన తరఫున చేర్చడంగాని, తగ్గించడం గాని చేయక నూటికి నూరుపాళ్ళు అనుసరించడం అమానత్‌.
(3) లావాదేవీలు
  ఇందులో చాలా విషయాలు ఉన్నాయి. అందులో కొన్ని విషయాలు;
(అ) ఎవరైనా మన దగ్గర తమ అప్పగింతలు (ఏ రూపంలోనైనా) దాచుకుంటే వాటిని వారికి ఉత్తమ పద్దతిలో అప్పగించడం అమానత్‌. ప్రవక్త(స) గారు మదీనాకు వలసపోతూ ప్రజలు తన దగ్గర దాచుకున్న అమానత్‌లను వారివి వారికి అప్పగించవలసిందిగా హజ్రత్‌ అలి(ర) గారికి అప్పగించారు. 
(ఆ) ఏదైనా బాధ్యతను అప్పగిస్తే దానిని ఉత్తమ రీతిలో నెరవేర్చడం అమానత్‌. ఏ బాధ్యతనైతే ప్రవక్త(స) హజ్రత్‌ అలీ(ర) గారికి అప్పగించారో ఆ బాధ్యతను నూటికి నూరు పాళ్ళు నెరవేర్చారు. 
(4) సద్గుణాలు; 
  ఇస్లాంలో ప్రతి విషయంలోనూ సద్గుణం అవసరం. అందులో కొన్ని విషయాలు
(1)చూపు: చెడు చూపు షైతాన్‌ చేష్ట.
మొదటి చూపు మనది. రెండవ చూపు షైతాన్‌ దని ప్రవక్త(స) తెలిపారు. 
(2) చెవులు: మంచి వాటినే వినడం, చెడు వాటికి దూరంగా ఉండటం అమానత్‌. చెడు మాటలు మాట్లాడటం ఎంత పాపమో వినడం కూడా అంతే పాపం. 
(3) నోరు: మాట్లాడటంలో నోటిపై నిఘా వేయడం ఎంతైనా అవసరం. ఈ నోటితో మంచి వైపుకు పిలవనూవచ్చు, చెడు వైపుకు పులికొల్పనూ వచ్చు. 
''అల్లాహ్‌ వైపునకు పిలిచి, మంచి పనులు చేసి, నేను ముస్లింను అని ప్రకటించే వ్యక్తి మాటకంటే మంచి మాట మరెవరిది కాగలదు?'' (హామీమ్‌ సజ్దా: 33)  
(4) చేతులు: అల్లాహ్‌ా ప్రసన్నత కోరి పదిమందికి మేలు చేయడం కొరకు ఉపయోగించడం అమానత్‌. అలాకాక ఇతరులకు నష్టం కలిగించి నరకానికి కూడా పోవచ్చు. 
(5) గుప్తాంగములు: ఏ విషయాలనైతే కప్పి ఉంచమని అల్లాహ్‌ తెలిపాడో వాటిపట్ల జాగ్రత్త పడటం అమానత్‌. కపటిని తెలుసుకొనుటకు ప్రవక్త(స) గారు ఎన్నో ఉదాహరణలు   ఇచ్చారు. అందులో ఒకటేమిటంటే అప్పగింతల విషయంలో వంచనకు పాల్పడతాడు. 
  జీవితంలోని అన్ని రంగాలలో అమానత్‌ల పట్ల జాగ్రత్త వహించడం అవసరం. ముఖ్యంగా ప్రవక్త (స) గారు ధర్మప్రచార బాధ్యతను ప్రతి ముస్లింకు అప్పగించారు. ఈ అప్పగింతను సమాజంలోని ప్రతి వ్యక్తికీ అందజేసే బాధ్యత మనపై ఉంది. ఈ బాధ్యతను     చేర్చవలసిన వారికి
సంపూర్ణంగా చేర్చి ఇహపరాల సాఫల్యం పొందుదాం. మనందరికీ అల్లాహ్‌ా ఆ భాగ్యాన్ని ప్రసాదించుగాక. (ఆమీన్‌)